孫明揚昨日指,反口要書商免費向學校提供「清水版」教師用書,是要揭露書商不合理定價。他又指,到書商為課本定好價才出招,是要防止書商將成本轉嫁到課本上,無法踢爆書商不合理定價、當家長是人肉提款機的賺錢手法。
不過,有政界人士指出,縱使孫明揚今年成功逼書商未計教師用書及教材成本定出書價,真的暴露了書商將成本轉嫁家長的劣行,「但係出年又點算?到時書商再將教師用書同教材成本計番入成本度,政府可以點?」該政界人士指,孫明揚提出電子書方案也好、邀請其他團體出版教科書也好,「唔係一、兩年內做到,可能要搞幾年,咁出年又要再同書商拗一次,後年又再拗一次?」
他形容,孫明揚所謂用「計謀」成功對付書商,有自吹自擂之嫌,因課本定價爭議根本未解決,「孫公係就係諗計,但係就係為佢自己落台諗計,反正兩個月後佢就退休,一切唔關佢事」。有公務員擔心,孫明揚公開承認有心「跣」書商,將令政府日後與相關團體為一些爭議問題談判時難以維持互信關係,對方未必肯信政府承諾,「驚俾政府跣一鑊」,這個後遺症可以十分嚴重,「人人唔順政府、驚政府有心裝陷阱跣佢哋,咁日後仲點同人談判?」《蘋果》記者