容祖兒前晚在紅館為一連六場的個人演唱會揭開序幕，邀請好友黃凱芹和林子祥（阿Lam）擔任表演嘉賓。Joey吊威吔在空中翻六個觔斗，又與黃凱芹大跳貼身舞，意識大膽。
Joey先坐在黃凱芹的大髀上，繼而黃凱芹蹲在她身前，伸手不停撫摸Joey肚皮，然後手向下掃落她下體敏感位置，最後黃凱芹忽然用手攬實Joey的玉腿，嚇了伊人一跳，Joey即說：「綵排冇咁勁㗎！」黃凱芹回答說：「你綵排時冇咁靚嘛！」

曾找情敵晦氣
Joey又邀請一位男歌迷上台，二人手拖手，場面溫馨，Joey坐在台中間的鞦韆，要求男歌迷推她玩鞦韆。Joey更憶述自己中三的初戀故事，她說：「當時男友突然同另一個女仔一齊，我試過找嗰個女仔晦氣，但結果俾男友鬧我多事，我好心痛。」
而阿Lam早前為汪明荃演唱會任嘉賓時，不慎失足跌傷，Joey前晚偕阿Lam表演時，不時小心翼翼照顧對方。阿Lam說：「我今晚肯嚟，我睇晒成個台，只係得一個窿，肯定冇第二個窿。」

吊威吔練到嘔
對於與黃凱芹跳貼身舞時，對方動作出位，完騷後Joey接受訪問時說：「本來嗰啲動作係我做嘅，諗住嚇佢，點知俾佢做咗先。而吊威吔嗰部份，我練到想嘔，所以演出前唔敢食太多嘢。」
採訪：王連連
攝影：陳慧安