天主教教區榮休主教陳日君今早出席網台D100節目，對於有教會學校被迫配合政府宣傳國安法，他指，在《校本條例》下，天主教香港教區已「管唔到」學校，「我哋又痛心又緊張，因為幫唔到」。他更不排除現時學校名稱中的「天主教」三個字，未來有可能會被移走，「我諗好快有一日呢，我哋可能要話對唔住，我哋唔係辦學團體嘞，（間學校）係校董會辦㗎喎。」他認為社會若想保留天主教學校的價值，就要靠家長和老師在校董會去爭取。

對於港府迫學校配合政府的鎮壓言論，陳日君說在大是大非面前，大家要問自己的良心，「究竟企邊一邊？」他又指，現時很多香港人的自由被剝削，「連言論自由都無，呢個係一個侮辱，因為喺言論自由嗰度，先能表達出人嘅尊嚴。」

他指，宗教自由和其他自由是不能分開，「如果一個地方無宗教自由，係完全無自由。」他又指，天主教信仰並無要求教友一定要與強權硬碰，「佢拉你、打你，你可以忍受，你抗議有自由，但唔可以跟佢講大話。」

天主教香港教區宗座署理湯漢樞機上月28日，向所有神職人員發家書，提到神父講道是敬拜行為，目的非傳達講道者個人觀點，例如對某社會或政治議題的見解。陳日君在出席網台訪問後，被問到神職人員就政治議題發表意見是否有問題時，他反問「咩叫做政治呢？而家我哋教會話，人係應該關心政治喎，而家問題係政治係有不同立場，全個香港分裂嘞，你教會可以唔分裂嘅咩？屋企都分裂嘞，係咪先？」

他又指，現時香港教區的「話事人」，明顯只聽靠攏中共的教廷國務卿帕洛林（Pietro Parolin ）指揮，「我好同情佢哋囉，好同情湯樞機，佢無選擇……而家講啲人哋唔鍾意聽嘅嘢，就已經犯法，咁就好危險，但唔講又唔啱，真係要天主幫忙佢點樣講到兩邊都唔得罪。」

陳日君在節目中透露，去年到訪意大利時，在最後一日時曾獲邀與教宗和帕洛林共晉晚餐約10分鐘，席間帕洛林不說一話，他在飯前已被告之不能談及「中梵建立」問題。陳日君最終在晚餐結束後，問教宗能否討論「中梵建立」問題，「我睇到教宗好尷尬，佢只話『我會處理㗎嘞』，就起身送我出門口。國務卿一句話無講，好明顯係佢命令教宗做事，想我知道教宗請我食飯，但唔會聽我嘅話。」

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android