前晚雖然無直播賽事，但馬會有為四場英超及一場歐冠盃外圍賽開盤，球迷都要做「功課」。五場戰果有熱有冷，當中最叫人意外，非列斯打和修咸頓○比○莫屬！
原因呢場波有列斯嘅維杜卡及阿倫史密夫，重有修咸頓嘅比亞堤及菲臘斯，四位都係當今英超聯數一數二射手，相信都冇乜波友會估○比○波膽！但最後戰果真係兩無紀錄，令我求大俠跌晒眼鏡！
其實都未必係四位射手冇料到，當時上網睇實比賽文字直播嘅我，就見到修咸頓門將保羅鍾斯屢救險球；加埋上周修咸頓又係打和伯明翰○比○，照咁睇，修咸頓嘅防守力確值留意。遲啲歐洲盃外圍賽威爾斯對意大利，前者隨時冇咗傷兵比拿美，真係要靠晒門將保羅鍾斯頂住嘞！

布祿瓊腳頭好應坐正
韋斯咸喺暫代領隊布祿瓊領軍下，從來都無令人失望過。好似前晚佢就領軍擊敗巴拉福特。計埋上季尾三場，佢領軍取得三勝一和佳績。雖然布祿瓊本人就一再重申冇意坐正，等會方搵到個適合人選佢就功成身退，不過球迷當正佢係英雄，話唔定佢盛情難卻，坐正都唔定。

巴治奧的最後殊榮
巴治奧喺一個由三千網民投票選舉嘅「金腳獎」中勝出，壓倒其他九個包括施丹、費高、馬甸尼在內接近三十歲或以上嘅球星。佢獲獎後將會響蒙地卡羅海旁大道留下腳印，意義等同荷李活明星喺星光大道留手印一樣。巴治奧踢埋今季就收山，呢個可能係佢所得嘅最後殊榮，真係恭喜晒。