Beyond樂隊跟「開心鬼」黃百鳴有何關係？就是新藝寶唱片公司。當年新藝城除了搞電影外，曾經與當時的寶麗金唱公司合資組成新藝寶唱片公司，曾加盟的歌手有許冠傑、張國榮、王菲等。

當年黃百鳴睇好Beyond這隊玩地下音樂的樂隊，於1988年跟他們簽約，他說︰「因為當年新藝城成立咗新藝寶唱片公司，當時有好多有份量藝人，包括許冠傑、張國榮等等，但我哋要捧啲新人，所以將一隊地下樂隊捧上枱面，就係Beyond。」

雖然Beyond跟新藝寶的賓主關係只是短短3年，但Beyond在這段期間創作了不少經典歌曲如《大地》、《喜歡你》、《真的愛妳》等，尊定他們在樂壇地位。其後更開始拍電影登上大銀幕，黃百鳴說︰「Beyond係新藝寶嘅歌星，我哋拍嘅戲緊係搵佢哋演出，先後有三部戲，第一部係賀歲片《吉星拱照》，嗰套戲嘅戲份唔係好多，第二部就係《開心鬼》第四集嘅《開心鬼救開心鬼》，前三集都係開心少女組拍，呢集換咗班開心少男，呢部同佢哋有對手戲接觸多咗，啲人話佢哋好難搞，我就話一啲都唔難搞，反而嗰班開心少女組仲難搞。」

談起Beyond中，黃百鳴回想永遠是他們大哥的黃家駒，「拍佢哋四個，我只要同一個人講嘢就得，就係家駒，家駒喺佢哋四個人當中係大哥，佢講咩三個都聽，所以合作過程非常順暢，容易過我拍開心少女組添。」

之後再開拍一部電影《Beyond日記之莫欺少年窮》，以Beyond四子為主角，回想往事，黃百鳴感慨說︰「嗰段日子，我哋係經常合作，包括電影、唱片。後來佢哋滿約，先至過去日本嗰邊，我記得當時我都有去日本探過佢哋一次，好不幸一個遊戲節目令家駒走咗，所以我對家駒都好有感情。」

精選娛聞，喺晒《娛果》
http://fb.com/appledailyent