打工仔買樓都精打細算，部份二手樓買家更會諗盡計仔壓經紀佣，甚至要求回佣。garygarden808喺《香港討論區》就公然問：「買家買樓時想壓佣係咪合法，有咩要注意？」
ahloahlo話：「唔好用個『壓』字，大家事先協議一個佣金折扣幅度，對方接受咪得囉。」至於壓佣會唔會俾差人拉，大家各有意見，raytank話：「合法，好多agent都有咁做，無論租或買賣都可以，雙方達成協議就得。我相信大部份人都有咁嘅經驗，但係如果個經紀服務好嘅話，你都心甘情願啦。」
gemoney就忍唔住講：「如果你有特別要求（減佣），應事先聲明，只要你情我願，絕無問題，但絕不可打死狗講價。」

必須事先協定

面對買家壓佣，宏基地產負責人呂承健話：「冇辦法杜絕，一個願打一個願捱，除咗壓佣，最常見仲有拖佣，有啲仲要入稟小額錢債審裁處追佣，平均一年有十單八單。」
現時代理向買賣雙方收取嘅佣金，仲未有一套法例基準規限，純粹係由雙方協定，多年嚟業界行規，都係向買賣雙方各收樓價1%佣，當然可以商議加減，不過，一切都要喺簽約前商議好，事後反悔就變成違約，隨時俾人告。