喺第一輪港姐面試裡面，因為外表同曾獲封日本國民美少女嘅後藤久美子有九成相似，再加上係黎瑞恩朋友嘅女兒，於是令到吳天兒（Tiffany)成為最搶眼嘅一位，因為呢個原因，Tiffany順利進入第二輪面試，亦相信會躋身今年候選之列！

今朝Tiffany現身康城站，佢笑容滿面咁停低接受訪問，講到成為大熱，佢笑笑口話：「多謝，我對自己有信心，上帝有預備。」今年22歲Tiffany喺15歲去咗英國讀書，今次唔係專登返嚟參選，佢亦唔擔心會惹是非：「我本身都冇嘢，自然冇事！」

問到小恩子有冇傳授心得？佢話：「佢叫我淡定啲，面對記者笑多啲。」見到Tiffany嘅皮膚有啲黑，佢話：「之前去泰國做一年義工，唔去冇機會，嗰陣主要喺山區教英文，我唔知呢啲係咪優勢，個個眼光都唔同，做自己ok。」至於話佢似後藤？佢就話：「真係誇獎，我高攀唔起，佢係日本國民美少女！」

以學歷取勝嘅犯罪學碩士Coco，佢直認收到電話有啲意外：「冇諗可以入第二輪，其他女仔嘅身材好，不過我覺得自己唔係贏，只係唔小心look咗入嚟，平常心面對。」佢仲話自己有睇fb留言：「睇到啲留言開心，話我似曾志偉同大蕃薯，我覺得好可愛！」

另外蘭依婷、美人魚教練Honey Ho同Norma都話對自己有信心！

精選娛聞，喺晒《娛果》
http://fb.com/appledailyent