一名婦人昨晚於fb出帖，並附上一張一頭鸚鵡被放進微波爐內的相片，帖文更寫上「加餸，紅燒乳鴿」字眼。事件引起公憤，大批網民斥責該婦人涉嫌虐畜。《蘋果》今日到訪該婦人寓所，由她親口講述事件始末。她否認當時有開着微波爐，放鸚鵡入內只是跟牠玩捉迷藏，「梗係冇開（微波爐）啦，我養到佢11歲，冇可能咁對佢！」她坦言沒想過事件引起巨大迴響，惹來攻擊詛咒，終使自己與愛雀需前往警署一趟，以協助調查，「後悔？其實唔覺得點樣後悔，但冇諗過咁大迴響，唔知道我個post，去到全世界任何一個人！」

事件中的女主人姓黎，她的鸚鵡叫Oscar，雄性，屬白帽鸚鵡品種。在牠半歲時，由外國入口，黎女士以數千元買下，至今11歲，黎7年前再買了一隻達摩品種的鸚鵡，3年前再買另一隻亞歷山大品種。「兩隻都係BB雀，但Oscar唔鍾意佢哋，反而鍾意同我哋玩，我不時會將佢放入盒、櫃或密封地方，同佢玩捉迷藏，幾秒或半分鐘攞返出嚟。佢又好鍾意匿枱底，凳底。」黎指Oscar與另外兩雀不夾，非常抗拒，會與牠們打架，落街見到小狗或貓，反而好開心。

黎女士去年身體狀況欠佳，病了九個月，已先後將兩隻鸚鵡送予友人，卻獨留Oscar，「我照顧唔到咁多，我病得好犀利，好吃力，最初想送晒畀人，我有個好嘅雀友，居住環境好理想，有地方畀佢哋飛，又有太陽曬。但我丈夫話， Oscar比較黐人，性格內向，去陌生地方會唔食嘢，唔飲水，我哋平時帶佢出街都係屋企附近，如果帶佢去遠啲，佢就會全日唔食嘢唔飲水，罷飲罷食，最後身體虛弱，就養唔到！」夫婦倆深深了解Oscar的固執性格，「佢換咗地方就唔得，而且始終同佢相處耐啲。」最後決定將Oscar保留身邊。

在與記者交談中，黎女士承認曾將Oscar放入洗衣機，又試過放雪櫃，「天氣熱，放佢幾秒攞出嚟，佢仲覺得好得意，佢又會匿枱底、櫃底，又鍾意碰下我哋腳趾，其實係同我哋玩，將佢放入微波爐，係無聊。」她指Oscar無試過大病，在16年曾做腫瘤手術，因此不能高飛。她又在記者面前示範微波爐在掩門未被關上的情況，發現除非使用者關上掩門，否則該微波爐在接上電源後，不論是否正在運作，微波爐內部仍會照樣着燈。她其後補充指，遭網民瘋傳的照片，其實是在遷就角度後才進行拍攝，令人錯覺Oscar身處於微波爐內的期間，微波爐看似已關上掩門並正在運作當中。

黎女士坦言沒想過事件引起如此大迴響，「唔知道我個post，去到全世界任何一個人，如果我自己睇到一個咁嘅post，我只會覺得『嘩，唔好嚇我，係咪真㗎 ，唔係吖嘛？』我會了解下，會唔會係拍戲假象呢？」她又說今次「當自己唔好彩，黑仔，啲人係咪唔理智，冇分析能力，又人身攻擊，幾惡毒嘅說話都講晒出嚟，我已經say sorry開埋live，要做的都做晒，但網民仍然話我用第二隻雀頂替Oscar。 」

她指出post後一小時，已有很多朋友街坊談及事件，朋友都說她「玩大咗」，之後她接了不少騷擾電話，又被人起底，包括姓名、住址，與丈夫的合照等，她說自己解釋過，道歉過，但仍被網民大罵，「俾人話我用第二隻雀掩飾，做替身，佢哋不停鬧我，用好侮辱字眼，好詛咒同攻擊的形容詞，雞蛋裏挑骨頭。」她說因為收到很多騷擾電話，感到人身安全受威脅，「又話知我住喺邊，唔知佢哋會對我做啲乜嘢，感到受要脅。」她昨晚帶着Oscar到北大嶼山警署備案。

記者在場亦曾近距離觀察Oscar的外觀，未有發覺牠身上有明顯的傷痕，或被虐待過的痕跡，惟牠身體部份位置則未見有羽毛覆蓋。黎女士則指，因鸚鵡正在換毛時期，故某些部位出現禿毛情況亦屬正常。訪問過程當中，Oscar與黎女士經常互動，兩者感情看似十分良好。不過，喜歡在單位內四圍走動的Oscar明顯十分害怕陌生人，當記者走進屋內時，牠更嚇得失禁，把大便拉在走廊上；惟當黎女士坐下與記者面對面進行訪問時，Oscar便冷靜地在黎女士手上乖乖站穩，更曾數次親暱地輕咬黎女士的指頭，似乎在黎的保護下便不再害怕陌生人。

白帽鸚鵡（ White-capped Pionus ）屬小型鸚鵡，個性堅強、勇敢，比較活潑外向。幼鳥時期頭部呈綠色，會隨着時間慢慢變白。由於牠們比較安靜，性情較穩定，不會突然性情大變而咬人，即使咬人其力道亦不大，適合當家居寵物。主要分佈在中美洲的西海岸地區，棲息於森林地帶和沿海低地林區。

-----------------------------
App內1-Click訂閱《蘋果動新聞》
按此了解更多
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568