雖然被特區政府入稟要求撤銷議員資格，香港眾志羅冠聰卻冇因此偷懶，趁Boxing day落區，喺香港仔擺街站見街坊兼交換禮物。吓，有得玩交換禮物咁happy？八方無呃人，聰聰呢個特設聖誕交換禮物站，用意非常好，鼓勵大家將唔啱用嘅禮物捐出嚟（唔好話你未試過抽中唔知用嚟仲乜好嘅禮物呀...），然後攞一份啱用嘅禮物走，減少浪費又互惠互利，以免份禮物擺埋一邊唔用咁鬼嘥！除咗換禮物，同場仲設議員傾偈站，畀居民分享意見兼訴心聲

聰聰喺Facebook話街站反應好熱烈，見到大家好開心咁笑住拎走真係鍾意嘅禮物！期間有小朋友扁嘴話冇帶嘢嚟喎，咁佢就話可以唱一首聖誕歌交換，「我相信價值呢樣嘢，喺我哋唔同人嘅心裡面都係唔同」，呼籲大家珍惜換返嚟嘅嘢喎。