【9月拜拜日】《都市閒情》《TVB周刊》Last day 傳無綫下月裁減收音師
裁員tvb周刊都市閒情配音員
無綫長壽婦女節目《都市閒情》,今日(28日)正式落幕,改革後取而代之嘅節目《流行都市》將於下周一開播。而今日同樣係最後一期《TVB周刊》嘅埋版日,據知一班員工今日嘅運作如常。與此同時,早前報道過4位合約配音員(新聞連結: https://bit.ly/2OWqBwi ),明天都係佢哋嘅last day,仲有傳大台下月又再裁員,今次開刀嘅部門係收音師,一句講晒,呢個9月尾,大台內部一遍愁雲慘霧。
有26年歷史嘅婦女節目《都市閒情》,今日播出最後一集,呢一集由姚嘉妮、張景淳、蘇晉霆主持,喺節目尾聲三位主持輪流講,緊張、興奮、期待同挑戰,姚嘉妮仲話︰「講咗咁多預告呢,因為下星期一至五,我哋有……」接住係蘇晉霆講︰「有好多新推介同新玩意」姚嘉妮再接住講︰「總之有好多嘢介紹,下星期一見,拜拜。」最終都係冇預告下星期一新節目《流行都市》有咩睇。
雖然一班主持有得留低,但有傳新節目會以「散貨場」形式去hard sell商品,變相係另類方法賣廣告。而一班主持同幕後,早幾日已經影大合照留念,宋芝齡喺ig貼相,留言︰「2018年 9月份最後一集Live《都市閒情》。」而章志文亦喺ig貼相,留言︰「都市閒情升班前影班相,台前幕後,新舊精英,十月換新裝。」睇嚟一班主持都好唔捨得。
而有21年歷史嘅《TVB周刊》,將於10月1日出版嘅最後一期(新聞連結︰ https://bit.ly/2M8k2Vi ),今日喺編採部最後一日埋版嘅日子,之後會轉網上版。據了解一班周刊員工,早有心理準備會「摺書」,所以今日員工嘅工作氣氛都好平靜。據了解,呢班周刊員工,未能全部人可以內部調職,大部份都要返到下周五(10月5日)才last day。
至於早前報道過,有4位合約制嘅配音演員,聽日係佢哋last day嘅日子。而因為大台早前要趕製《延禧攻略》,原本8月會被開刀嘅收音師「超時」工作,據知下個月會裁到呢個部門,有員工話︰「逃得過8月,逃唔過10月。」睇嚟大台嘅裁員潮,陸續有來。
精選娛聞,喺晒《娛果》
http://fb.com/appledailyent