歌手鄭俊弘(Fred)兩個月前被爆同何雁詩（Stephanie）拍拖，男方隨即被踢爆背拍拖3年嘅富貴未婚妻Beebs偷嗒何雁詩，鄭俊弘更霸氣拖何雁詩見傳媒認愛，本來被大台重用兼力捧，一夜之間形象插水，背負「賤男」之名，即被大台掟入「雪櫃」，自許廷鏗決定唔同大台續約、吳若希又忽然去咗產女，星夢忽然將有鄭俊弘「解凍」(新聞連結： http://bit.ly/2tlTOFd )。

鄭俊弘今日出席IFPI香港唱片銷量大獎，佢同坤哥都係分別拎咗四個獎，算係男歌手嘅大贏家，打和!鄭俊弘稱係好大嘅驚喜，因為《炮火》呢首歌係自己作曲，所以會更加感動。

講到佢同何雁詩未發生事之前，出咗《炮火》，又出碟《當狗愛上貓》均有成績，怕唔怕之後會有影響，鄭俊弘話：「呢啲都唔會諗太多，用盡自己心機去做好自己嘅音樂，同埋公司都俾我好大嘅信心，俾我去作曲，o依家啲新歌都係自己作，老闆都聽咗。」

咁女友何雁詩有冇聽過首新歌，鄭俊弘直言：「冇!俾老闆聽先。」問到許廷鏗都有獎拎，不過因為許廷鏗過檔去華納，所以冇份嚟，會唔會戥朋友覺得失望，鄭俊弘就話：「都有少少嘅，我都有聽佢啲歌，好有個人嘅性格，都恭喜佢攞獎。」鄭俊弘最近要跑步keep fit，要戒宵夜，又會做健身，問佢算唔算被公司「解凍」，鄭俊弘話o依家算係有番啲工作，譬如出活動、錄音嗰啲，暫時未有安排佢拍劇，老闆叫佢做好音樂先。