楊鐵樑夫人譚愛蓮上月31日去世，噚日朝早11時，喺花園道聖約翰座堂舉行追思禮拜。八方以前有事搵楊官，電話多數都係楊太接，聲音猶在耳，人就去咗另一世界，諗起都傷感。楊官噚日精神唔錯，大班來致意嘅親友，排住隊同佢握手，佢有時亦勉強擠出少少笑容，但實情就好落寞。事實過去大半年，楊官為咗照顧患病嘅太太，深居簡出，電話都好少講，大家都明白佢一定好難過。
楊官以前係首席大法官，九七回歸，佢棄官從政競選特首，雖然未能當選但亦贏得對手信任，出任行會議員。近年主要做一啲公益工作，例如幫吓香港大學手，又或者教吓小朋友英文同禮儀。

邵逸夫親來致意

呢位謙謙長者，係正道中人，為官做事，得人尊敬。噚日去慰問佢嘅朋友就有好多，年紀比佢更大嘅鍾士元，揸住支枴杖都嚟；剛剛入過醫院嘅邵逸夫，亦喺方逸華陪同下到來致意，兩大校長徐立之、劉遵義，前任特首現任特首董建華曾蔭權、黃仁龍、李柱銘伉儷、李國寶夫婦、田北俊兩公婆、曾俊華、王永平、何志平、周梁淑怡、方敏生、梁錦松、梁愛詩……數都數唔晒，後來又見到李鵬飛同佢太太，多數人都一身黑衫，芳艷芬一襲藍色套裝，手挽白色手袋，好突出，而方逸華就白裙深色外套，披一幅淡藍色絲巾，兩個都咁有氣派。
在楊太過身之後，八方喺公開場合見過楊官一次，當日佢都打條黑呔，同噚日一樣。睇嚟喪妻之痛，需要一段時日先可以淡化，希望楊官節哀、保重。