噚日內地公佈最新通脹數字，舊年全年超出政府預期嘅3%目標，去到3.3%。單係上個月已經4.6%，亦高出市場預期，唔到你唔認同「通脹猛於虎」。中央要遏止通脹，加息似乎勢在必行，一位北京朋友就同敏妮講，內地已經盛傳，春節之後就會宣佈加息。其實市場早就預期內地會加息，所以究竟對股市有幾大影響，真係好難估計。

加息周期　有升有息

最近睇TVB嘅《新聞透視》，有一集以「通脹來了」為題，裏面訪問咗陳振康。如果有睇開上市公司通告嘅，對呢個名字都應該唔會陌生。先唔理佢喺股壇嘅身份，但佢喺節目裏面提到「有一樣嘢一定要做，就係轉人民幣，家胡主席、溫總理包你每年賺8%，一定升你都唔去做？」敏妮都幾同意佢嘅講法，所以催促編輯M快啲開人民幣存款戶口。
喺時裝雜誌做嘅編輯M，每年兩次去歐洲「朝聖」，既為工作亦為個人興趣。敏妮開口埋口講搵錢，佢就開口埋口講名牌。不過，佢始終唔係十八廿二，一屋名牌唔能夠支撐退休生活，敏妮成日叫佢要為將來打算。人民幣已經唔係有升值潛力，而係擔保實升，加上踏入加息周期，存人民幣息價兼收幾乎係肯定，只差升幾多、加幾多。
長途跋涉去歐洲咁遠都得，何況係搭個零鐘車去深圳開人民幣戶口，所以敏妮唔止催編輯M喺香港開人仔戶口，更叫佢好好考慮同敏妮一齊返大陸開戶。通脹係必然嘅事，錢即使唔用唔使，但係唔投資都會自己縮水，唔到你蹺埋對手闊佬懶理。

溫敏妮
http://wanmanli.com/blogs/