周六意甲早場，啱啱周中意大利盃先加時淘汰死敵國際米蘭嘅AC米蘭，作客憑後備上陣嘅查漢奴古門前執雞，1:1逼和費倫天拿，總算喺聯賽都止一止血，結束兩連敗。

自從加度素領軍後，畀人覺得仲衰過蒙迪拿之前帶隊嗰期，仲傳佢因為唔滿意球員冇鬥心，曾經諗過帶隊四場後就閃電辭職，而球會亦想搵番蒙迪拿重掌帥印，但隨住後者已經同西維爾接觸，好快就同球會正式解約過檔後，球隊都疊埋心水唔諗咁多。

周六對費倫場波，佢哋搵周中幫球隊一箭定江山、踢國米出意盃嘅後生仔柏德列古度尼打正選箭頭，雖然唔見得攻勢有特別改善，仲要踢到71分鐘先失一球，被施蒙尼嘅囝囝基奧雲尼施蒙尼接應左路傳中頭槌攻破大門，但三分鐘後，入替波連尼嘅查漢奴古，就藉對方門將史樸迪路撲出蘇索右路突如其來嘅遠射後甩手，門前成功執雞，最終場波就以1:1完結，亦令加度素暫時可舒緩一下。值得一提，周中因傷缺席意盃嘅AC門將基安盧基當拿隆馬，雖然有傳一月轉會窗會走人，但呢場仍然復出正選把關。

----------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM