建築署署長余熾鏗下月退休，政府噚日宣佈副署長劉賴筱韞升職坐正，7月5日履新。建築署歷年署長清一色係男性，劉太係首位女性署長，據講署內人員7.3歡送余熾鏗，政府建築署人員協會主席郭挽寧指劉太樂於與工會溝通，對佢升職感到開心。

有官員對劉太升職大惑不解，因為佢已58歲，最快一年半後就夠60歲退休，部門首長任期咁短似非健康接班安排；有消息指當局曾考慮由房屋署副署長馮宜萱過檔統領建築署，事關佢係專業建築師，而且在發生短樁醜聞後，改善監管程序有功，可惜最終被劉太KO。
升職有時要曉走線，官場小道消息話劉太同特首煲呔返同一間教堂，又與建制派太太團「婦協」行得埋，公務員事務局局長俞宗怡則讚揚劉太熟悉建築署運作，兼具出色專業及行政才能。另一官員認為劉太似係過渡人物，因為建築署未來幾年重頭工作包括西九文化區、添馬艦政府總部同郵輪碼頭，馮宜萱等多一年半載，仍大把機會發揮所長。