【李八方online】反擊李嘉誠？駱惠寧巡中資米倉廁紙倉要穩定供應
蘋果日報 2020/02/17 19:34
李嘉誠李八方ONLINE駱惠寧
駱惠寧巡視招商局米倉。中聯辦網站圖片- 駱惠寧到中銀香港總部。中聯辦網站圖片
鬼叫個特區政府好廢，公眾零信任，所以喺武漢肺炎肆虐之下，除咗真正必須嘅口罩，連柴米油鹽同廁紙都搶購一空，令到近期靜悄悄嘅市道中，最多人聚集嘅就係超級市場，時有同北京意見不一嘅李嘉誠旗下嘅百佳，日日其門如市極有人氣，某程度上成為咗香港人嘅心靈慰藉，就算買唔到只係排吓隊都好似滿足多一點點。
對於西環嚟講，百佳成為港人靠山，認真「冇面」，乜中共唔係已經喺香港建立紅色經濟圈，中資企業應該畀港人知道萬大事有佢就得咩？結果上任冇耐嘅中聯辦主任駱惠寧出擊嘞！中聯辦網站今日發佈新聞稿，話駱惠寧好關注民生物資嘅供應保障，分別向華潤集團貨倉同招商局集團米倉等等主要負責人，了解豬肉、大米同廁紙等日用品倉儲嘅供應情況，引述兩間都話貨源充足兼供應正常，駱惠寧則對兩間公司大幅增加物資調運、倉儲、投放做法表示讚許喎！
保供應就是保民生，呢句係駱惠寧講嘅，佢話在港中資企業要以高度責任感同使命感，充份發揮背靠內地、聯通全球嘅資源同物流優勢，繼續穩定貨倉儲備，千方百計增加市民必須嘅食品同關注商品嘅供應。
據報佢同時到訪中銀香港總部，讚揚中銀香港第一時間推出「還息不還本」等金融服務支持措施，想方設法為兩地抗疫提供金融支持和業務便利，又去到中石化香港嘅青衣油庫進行調研，充份肯定佢哋採取有力措施保障香港地區油品嘅穩定供應。
八方見到駱惠寧視察時都有戴口罩，似乎連佢都冇響應林鄭嘅「限罩令」呼籲。