當年今日
關於我們

水貨佬話今年收入跌5成

蘋果日報 2002/11/30 00:00


燈頭榮走水貨兩年,雖然未算風生水起,但總算搵到啖食,相比起以前做裝修收入較穩定,唔怕冇工開。不過,燈頭榮話今年連裏原宿貨條水都萎縮埋,收入比舊年同期跌近五成起碼,估唔到今年比舊年更加嚴寒。
本來12月應該係旺季,舊年可一個月內飛去兩轉入貨,但今年燈頭榮決定費事過去,連機票都慳番。燈頭榮:「12月,日本啲𡃁仔放假,個個鬼咁得閒,加上可能想搵外快,多咗好多生口面嘅細路喺裏原宿排隊,啲人多咗起碼一倍以上,『利叭酷』門口條龍可以去到HeadPorter路口,想入正價貨就要花多咗成倍排隊時間。平時一轉可入滿兩篋貨,𠵱家咁多人排隊,花嘅時間長咗,一個篋都入唔滿,機票錢蝕埋,重邊有心機做?」
燈頭榮話橫掂11月入嗰轉貨未賣晒,希望趁聖誕清埋批貨,再諗第二啲嘢。上年水貨大亨「袁人祥」預言一年內水貨舖會執一半起碼,其實點止呢個數,𠵱家全行只執剩五間大行,其餘啲一人細舖個體戶已紛紛轉型,連袁人祥亦已轉行做生產,設計大批特醇裏原宿風味「時裝」出口台灣,實行由「利時猿人」化身為「檳榔猿人」。

主持人:大食Jack
八卦熱報:[email protected]