呢個病，好多政壇領袖都會有，患者包括美國總統小布殊、香港嘅代表就有文革曾。呢個病就係「偶發性語言失調症」，香港最近新增一宗確診個案，患者係政務司司長唐英年。
繼讀出昂坪「衫．碌．拎」事件後，唐唐噚日又講錯嘢。當佢同深圳市長許宗衡開完深港合作會議出嚟見記者時，唐唐忽然發台瘟，失驚無神話好高興今次同許仕仁司長主持會議，全場人愕咗然，唔知佢搞乜鬼。
不過唐唐即刻發現自己講錯嘢，嗱嗱臨更正。許宗衡見慣大場面，港官亂噏嘢閒事一樁，面無異色，反而唐唐就好尷尬。八方以為唐唐只係一時大意，點知佢答記者問題時，又錯多次叫許市長做許司長，由此可以判斷佢已感染咗「偶發性語言失調症」，八方擔心呢個病已經喺政府高層蔓延，隨時一發不可收拾。

八方翻查文獻，懷疑呢個病潛伏期達五年，因為02年唐唐初擔任問責官員時，曾經斷言自己有生之年，香港失業率都唔會跌番到97年嘅百分之二。噚日公佈最新數據，9月至11月失業率由3.9%回落到3.6%，根據趨勢可能繼續回落，性命攸關，唐唐面對壓力而發病都唔出奇。