年輕時忙於接拍電影，近年淡出幕前享受人生兼投資有道的嘅關之琳，噚晚同趙世曾及女伴、顧紀筠、莊思華、袁婭維等出席「愛彼女皇盃」假啟德遊輪碼頭舉行慶祝派對，手戴64萬5千元名錶嘅關之琳跟主辦高層合照後接受訪問。

關之琳笑指自己以前好似病態咁、會戴著錶瞓覺沖涼，可謂「錶不離手」，佢話:「可能以前拍戲嘅關係，成日怕遲到，所以沖涼瞓覺都戴住，好精神緊張。依家放低咗隻錶好耐。我以前係準時到不得了，係最早到片場。」

關之琳又有收藏手錶嘅習慣，有襯衫出街嘅，有朋友送贈啲可愛款式，有具收藏價值嘅，亦有街買價值十蚊嘅手錶。之之話依家唔太捨得買太名貴手錶，最貴嘅，都唔會超過一百萬。

咁最有紀念性嗰隻手錶係人家送定自己買？之之話：「係人哋送，價值好平，最緊要嗰個人有心意送就得。」至於係咪男朋友所送，佢就賣關子唔肯透露。

家中不少具收藏價值或別具意義物品，關之琳每次欣賞時，都會諗下之後點樣處理。佢話：「我又冇小朋友，可能有啲好有意義嘅嘢，將來會拎出嚟做善事拍賣，咁樣會對我更有意義同適合。」

至於過去嘅復活節假，之之就好開心咁話好耐冇試過留喺香港過節。佢話：「難得假期喺香港冇乜人，我周圍行街食飯，都冇人認得我。」假期香港冇乜人？邊區啊？介紹下好嗎？