咖喱牛腩:與政治有關 - 牽牛

蘋果日報 2013/10/25 00:00


呢期香港最熱門話題,梗係免費電視台發牌問題,最有心搞嘅維基台竟然落選,背後原因眾說紛紜,到底係一籃子定一男子嘅決定,仲未有人確定;睇過維基台部份劇集同資訊節目嘅預告,確係有心機搞好質素,咁期待係一個叫挑戰嘅節目,由藝人連同攝製人員挑戰世界不同險峻自然環境,好似越南韓松洞咁;但𠵱家冇牌,唔知幾時先有得睇。不過香港人係犯賤嘅,星期日咪一樣坐定定睇個「哈哈哈」女人教人用雞汁煮餸。
維基台冇牌唔係節目質素問題,卡斯拿斯冇正選,亦都唔係把關技術問題。如果你問100個球迷,相信有99個球迷會答,卡斯拿斯把關技術比迪亞高洛迪古斯好,唔好計佢幫西班牙贏過兩屆歐國盃同一屆世界盃,仲有幫皇馬贏過西甲、歐聯、西盃等等冠軍,淨係9歲開始效力銀河艦隊,呢份忠誠已經值得尊重啦。但好衰唔衰聖卡斯效力嘅係皇馬,管理層最怕功高蓋主之餘,過去隊長都冇咩好結果,好似當年皇馬寧願出大部份波糧,都要趕魯爾去史浩克04一樣。雖然有傳卡斯拿斯係金手指,透過主播女友嘅關係,將一啲球隊機密同衰嘢發放出去,但一來冇人證實,二來罪名又唔係十惡不赦?
蘇局長講維基台冇牌唔係政治因素,皇馬教練安察洛堤都講,聯賽唔用卡斯拿斯只係戰術因素,同政治無關;國父孫中山有言:「政治乃眾人之事。」其實呢啲又點會唔係政治因素,不過以今時今日呢個局面,撐卡斯拿斯拎番正選,同撐維基台有牌一樣,只有童話故事先會出現。文:牽牛
鄭中基@谷德昭搞笑孖寶再發功,笑彈繼續嚟!
周一至周五《亂噏24》約定你: http://bit.ly/appletalk24