今年由學者變高官嘅勞工及福利局局長羅致光（CK），一向IQ爆棚，咪以為佢識得腦筋急轉彎，細個肯定狂咪參考書實用書等等，相信唔係佢自爆，大家都唔會知，原來年紀輕輕嘅CK，其實經常刨馬經。

羅致光喺慶祝長者安居協會20週年會慶，結編成書嘅《20種港式成長》中透露， 自己年幼時經常刨馬經，每次跑完馬，佢都會睇吓啲馬評人表現，望望佢哋究竟賺多定輸少？人家英雄出少年，CK就馬場出少年，諗法果然係寧舍不同。

CK仲喺書中透露，原來佢有讀寫障礙，睇字係掉轉邊，所以除咗一直計數叻之外，不甚了了，但後來呢位小伙子覺得，人生點都要考一次第一，於是就喺小五時，將所有可以背嘅科目通通讀熟，結果如願考到第一名。嘩，剩係呢點已經同搵佢入熱廚房嘅林鄭好夾啦；之不過當中都有少少分別，佢覺得第一呢樣嘢，考過一次就夠晒，唔似得娥特小時候，考唔到第一會喊咁口。