無論做些甚麼，總有一班自命看透世事L硬要跟你唱反調。自稱畫字佬的Kit Man最近在眾籌網站crowdfundhq.com籌旗65萬，希望瞓身兩年把他一直畫開的「獻醜體」製成電腦字體，仲因支持者建議而改了個好有氣勢的名字「勁揪體」，用以撐廣東話及正體字。他的字歪歪斜斜，但又偏偏好好睇睇，在「我要真普選橫額」或港中足球大戰為香港隊打氣的「香港勁揪」旗，你或者都有看過。今次的眾籌活動，就有人話佢「消費正體字」。他回應得好妙：「係呀，我消費正體字，仲消費埋造字的倉頡。我其實好希望大家一齊消費，做多啲，等正體字發展更百花齊放。另外都好想大家見多啲不同字款，電腦字不一定只有細明體、黑體。」

「勁揪體」包括6,000多個香港常用字及其他字符，即係包括嘅、呢、喎，粗口字當然不會遺漏，而今次Kit Man就得到研究粵語文化的組織「粵典」幫忙，得到4,700多個香港常用字字表。呢件事有香港人撐當然唔出奇，眾籌反應也十分好。計劃只是開始了數天，已經籌到20多萬，但他其實不樂觀。他笑說：「完全沒信心，的確有朋友同埋朋友嘅朋友支持，而且係大額支持，不過過咗呢浸，之後先係真正考驗，會保持响同一水平，直到過咗60日就收皮。」港豬上身的我問：「預咗收皮，做乜仲要做先？」佢答：「咁有啲嘢唔係知道得先做，而係做咗先知得唔得。」喂，你啱。而且整個計劃也是對政府暗地強推簡化字控訴。「政府愈打壓，民間偏偏愈要發聲。即使最後計劃真係唔成功，起碼我做訪問鬧咗政府，都係賺咗。」

有人覺得65萬好貴，仲幫佢計數，講到佢掠水咁，但其實費用除了包括他兩年的薪金，還有兼職造字輔助員及拼字系統程式員的人工，而且仲有各項濕碎開支。「有意見話我一分鐘就可以撩好一隻字，橫掂你都係亂來，很快就搞掂。正如啲客永遠同設計師講『你按兩按mouse就想收錢，你儍o架？』。」一句撻着設計師無cost，但人家寫好多個字才選一個來用，cost其實好高。「正如黎天王咁講，你買就買，唔買就唔買，自由市場自由選擇，無壓力，幾好。」

不過他承認由於佢手字東歪西斜，之後還要研發一個拼字程式把字串連組合，當中的確有困難，也自知在這方面有不足。不過知恥近乎勇，世上無難事，只怕有heart人，Kit Man就肯肯定有heart嘅。

記者：葉青霞
攝影：徐振國