自從10月25日「開心健康」贏馬後，賀賢馬房已經連續10期賽事未有頭馬進賬，季內只贏得四場，在練馬師榜排名跌至倒數第四位，成績陷於低潮。今期(3日)日賽第三場賀賢的「威武再現」面對同齡三歲對手，有力贏馬打破悶局。

第三場四班1400米，只限三歲拍賣馬或三歲PPG參賽。「威武再現」上季初出跑新馬賽，當時狀態遠離水準，亦只輸個半馬位跑第二，質素肯定高過該仗頭馬「爆騷」。

上仗「威武再現」插入四班後首戰，初遇舊馬兼且孭132磅，谷草1200米排九檔難跑，前段刻意收慢拖後，直路竟然能夠後追跑第四，末段更造出22秒51快時間，表現實屬超高難度動作，質素可媲美同父馬「牛精叻仔」，至少值三班頂。今仗只是面對同齡對手，配潘明輝減七磅更著數，穩位望贏。

同場「飛霸龍」上仗在港初出贏1200米，母系血緣有長力，增程二百米啱跑，可爭連捷。「美麗寶貝」上仗初跑同程即勝，第二次上陣已開齋，質素至少值70分，需要跟進。「醒目再臨」試閘一再追得好，上仗初出跟前跑兼走外疊望空，輸在際遇欠佳，今場排位好轉，如留前鬥後，表現隨時由蟲變龍。