專制獨裁扼殺創意，呢個係好多現代人嘅基本信念。強國喺呢幾年都不停咁講要喺科技上「自主創新」，可惜都俾人批評只係識偷同埋「山寨」。下個月踏入創刊120年嘅《麻省理工科技評論》（MIT Technology Review）就認為，強國人唔係無創意，亦唔係缺乏科技創新，只不過係每次稍有成績，就俾中共吸納收編，部份仲用咗嚟做壓制人權自由嘅專制統治工具，最終走上歪路。

《麻省理工科技評論》（下稱MITTR）最新呢一期，正係佢哋120周年嘅紀念特刊，估唔到竟然用咗中國科技發展嚟做主題，咁啱又撞正之前瘋狂科學家賀建奎「製造」基因編輯BB，同埋華為孟晚舟被捕呢兩單野，再加上中美貿易戰仲未完，所以格外引人注意。正如MITTR編輯所言，佢哋嘅文章嘗試回答一個問題，就係強國喺呢種由專制政權統治、強調「由上而下」嘅經濟社會與文化教育管治模式底下，係咪真係可以喺當今最熱門嘅核心科技，例如生物基因、晶片、AI、量子力學、太空科技等領域上，超越歐美嗰啲奉行民主自由體制嘅國家，成為全球科技嘅領頭羊？

MITTR呢個project真係好大野心，令人聯想起過去一個世紀困擾不少歷史學家嘅難題──點解科學同工業革命無喺近代中國發生？提出過呢條問題嘅人，最出名嘅應該係英國學者李約瑟（Joseph Needham，1900年-1995年），所謂Needham's Grand Question，到今日都仲有人談論。喺李約瑟解答呢條問題嘅複雜論述裏面，其中一個重要論點係中國自秦代開始就一直都係實行所謂嘅「儒家封建官僚體制」，嗰種由上而下、執行中央指令嘅官僚思想，已深入中國人「骨髓」，令佢哋好抗拒轉變，所以好難有創新。呢個正好解釋中國歷史上多次變法維新，點解都係失敗告終。

到咗今日，呢種睇法依然有佢嘅市場。事實上，有好多人都覺得，強國只係識「山寨」其他國家嘅科技，再加上意識形態控制，就連上Google搜尋嘅自由都無，點有自主創新？強國的確喺過去十多二十年揼咗好多錢去搞科研。有數字顯示，強國喺國際科學期刊上所發表的學術文章，以及發明專利的數目已超越美國，成全球第一。不過，真正有影響力嘅學術文章並不多見，被人引用嘅平均次數亦遠低於歐美國家。而喺強國好多所謂發明專利其實都係「垃圾」，當中大部份過左5年期限都沒有再延續個專利。加埋貪腐問題，投資與回報嚴重不成正比。

之但係，喺某啲領域上面，例如電訊、網購、電子貨幣等，強國又確實領先西方不少國家，係咪純粹靠「山寨」？呢個問題好值得大家去討論一下。MITTR就有篇文講到，喺強國搞IT同埋科研，其實競爭相當激烈，有80%最先進嘅科技產品都係由中小企製造。不過，好多具民間智慧嘅創新意念一旦成功，就會被中共吸納收編，仲不斷咁複製。唔少有潛質嘅民企，甚至會被國企強行入股。好似生物辨識、遠程監控同網絡防火牆呢啲有助維穩、鞏固專制統治嘅產業，咪獲得政府大力支持囉。只要呢啲民企識得迎合中共嘅需要，根本不愁無資金。咁咪走歪咗路囉！之前強國有一間喺海外有業務嘅科技公司，俾國際人權組織踢爆咗喺新疆廣設CCTV監控維人外，仲參與當地洗腦再教育營嘅建設，結果成為咗美國攻擊嘅對象。

科技創新同專制獨裁，真係可以「完美結合」？喺人類歷史上，相信就只有納粹德國做得到。二次大戰期間，納粹德國武器推陳出新，一度令盟軍招架不住，即使到戰敗後仍有不少嶄新武器，嚟唔切投產。睇嚟習帝之前話，要喺中共領導一切底下，加快關鍵核心技術自主創新，原來真係無咩矛盾！？難怪有評論咁話，喺中共「黨國一體、舉國體制」之下，「倒逼」強推出嚟嘅自主創新工程，輕則一事無成，重則為禍人間。

花生評論員