委任區議員唔使參選就有庫房出糧食「政治免費午餐」，被謔稱「政治綜援戶」，八方未見過有人敢掛街板表明自己係委任議員，做議員做到咁𤓓，好彩有中大雪中送炭幫呢班「次等議員」平反。
最新一期《中大校友電子月報》祝賀30幾個校友當選區議員，校友身體力行支持民主當然值得表揚，最令八方佩服嘅，係中大一視同仁，同時報喜稱「最少六位中大校友獲委任為區議員！」嗰個感嘆號真係可圈可點。
中大雪中送炭，八方一於錦上添花，寫多次呢幾個奉旨攞納稅人啲錢嘅「政治綜援戶」係乜水，分別係葉賜添、劉志宏、莫仲輝、黃萬成、盧佩珍同盧偉國。