踏入2002年，人人都話今年應該係復甦嘅一年，阿虎都希望係咁，不過事與願違嘅機會實在唔低。過去一年不少香港企業進行減薪及裁員，除咗因為舊年環境唔理想之外，亦因為對前景唔樂觀，所以要做定瘦身行動，假若環境繼續轉壞，香港失業率可能進一步上升，最近里昂就預期今年失業率可能升至7.1%，就嚟追得上法國嘅9%。
早前市場傳出大戶會喺年底前做淡港股，結果大除夕半日市冇厘動靜，唔通又係流料？
Cookie話，雖然大戶普遍睇好今年股市走勢，但首季會先質低港股，然後至大舉入貨。由於全球經濟有唔少隱憂，現時掃貨風險唔低，縱然大戶手上錢多，亦唔代表隨便入市。
近期阿Tom（8001）愈升愈有，大除夕半日市升近5%，收3.825元。黑客話有心人想將隻股炒上5元以上，阿Tom將會係今年創業板之星。
阿Tom近期頻頻以每股逾5元作價發行新股四出收購，加上今年之內可能會分拆印刷業上市，單係為分拆造勢，阿Tom就應該炒上5元樓上。

捧活力世界要執生
活力世界（8100）首日掛牌，一如所料股價被大幅炒高，升幅一度高達31%，升至0.43元，不過隨即腳軟，質番落0.39元收市，升幅收窄至21.9%。i師傳話，隻股可能短期內會再炒高一轉，不過大家捧場要執生，記緊定好止賺及止蝕位。