白禮頓禮拜五晚喺英超作客以3:0大勝韋斯咸當然值得高興，喺比賽期間亦都出現咗令球迷笑到有腹肌嘅一幕。

話說客隊喺上半場補時階段由荷西伊斯基亞度射入一球靚波，領先到2:0嘅時候，一班球員梗係瘋狂慶祝喇。球員雙膝跪地跣草呢一招好常見，不過可能白禮頓中場安東尼洛卡特平時無乜練習嘅機會，竟然完成唔到呢個慶祝動作，仲搞到自己喺鏡頭面前仆低碌咗兩碌，無端端成為外國網民嘅笑柄。