噚日係梁詠琪（GiGi）39歲生日，不過佢生完冇耐，仲喺屋企坐緊月，所以唔打算出街慶祝食飯啦！只會同老公Sergio、囡囡、媽咪、細佬喺屋企食飯，噚日同GiGi通電話，同佢講生日快樂！聽佢把聲都好精神開心，問佢多了一個女兒，今年生日係咪不一樣？佢話：「係呀！活咗39年，今年過嘅生日最特別，囡囡嘅來臨，勝過任何生日禮物，經歷過自己湊BB後，我先發現媽咪好偉大。」

GiGi話自己親手湊女，冇請陪月，搞到每晚要起身餵人奶好辛苦，佢講：「餵咗兩個禮拜後，真係頂唔順，所以之後我先將人奶儲入雪櫃，到夜晚就叫老公整番熱啲奶畀佢食，兩個人輪更服侍囡囡，好彩老公放成個月假，可以幫吓手，見到老公同個女沖涼，我就好羨慕，好想參與，但阿媽話我仲未掂得水，湊女真係唔容易呀！」因為唔沖得涼，生完到𠵱家，GiGi只能抹身清潔身體，等坐完月，估計5月佢就會復出工作，努力搵奶粉錢。
撰文：馮仁昭