韓國女團少女時代(少時)成員孝淵早前以DJ身份出席電音活動，點知卻被身旁嘅外國男子當眾非禮，此舉唔止激嬲孝淵，連粉絲、網民都睇到眼火爆，怒批該名男子唔尊重。

據悉孝淵日前參加電音活動，趁空檔時就透過Instagram玩直播同粉絲互動，點知企喺佢身旁戴住眼鏡嘅外國男子卻不斷伸出鹹豬手，做出非禮舉動，孝淵不滿地反抗，更連續4次用英文大鬧：「唔好掂我！」但該男子竟反口稱：「如果你要喺我嘅台上，就要遵守我嘅規則，唔準影我！否則你落台！」不過孝淵亦冇退縮，更直接用電話影住該男子，透過直播公開該男子嘅樣貌。

孝淵當眾被非禮，令粉絲都相當擔心其安危，但孝淵卻無奈地表示：「有時就會遇到呢種唔好嘅事。」事件令粉絲都相當嬲，紛紛留言「要求主辦單位道歉」、「公開該男子嘅身份」。

精選韓流，喺晒《娛果》
http://fb.com/appledailyent