立法會九龍西補選提名期展開第三日，唔等劉小麗參選資格結果、提早報名嘅前民協馮檢基，今日中午喺facebook出post，話佢已登記為補選「候選人」，受《選舉及舞弊條例》規管，呼籲網民幫幫手：「若有網台，傳媒評論員言論，有失實聲明，抹黑，造謠，企圖扭曲狀況，影響選舉」，就記得pm私訊通知佢，一早解釋咗提早報名係因為「唔想再俾人鬧」嘅阿基仲話呀，相信大家會為香港的民主和民主選舉，「共同建立平台，建立民主文化！反對文革批鬥式選舉行為！」以前出名主張「又傾又砌」嘅阿基似乎好介懷外間說話，唔傾就「砌」，仲講明「如有證據，報警處理！」

八方就此問過資深大律師兼公民黨主席梁家傑，傑哥話選舉嘅嘢，「兩陣對壘，互相攻擊、責難梗有㗎啦」，外界對阿基哥嘅批評係咪構成違法行為，只要係「講事實就得」，例如附以相片或文件佐證。傑哥仲舉出當年唐英年與梁振英喺特首選舉爭櫈仔例子，唐當時大爆梁03年倡以防暴隊和催淚彈對付示威者，「梁振英有冇郁（控告）佢（唐）啊？冇啊嘛！真係講過啊嘛！」佢話空口講白話梗係唔得，但喺邏輯辯證下之下，「推（論）支持你，就冇問題」，至於有講法批評阿基「收錢」參選，傑哥就同意「有啲嘢唔應該講」，「唔係選舉（條例），都可能構成誹謗」，但強調：「絕對唔係樣樣嘢都唔講得」，批評阿基公開收集抹黑材料，係「學埋老共啲嘢，搞白色恐怖，要人人自危，個個噤聲！」

阿基今次參選，將矛盾指向整個民主派，不滿民主派透過協商，等劉小麗「欽點」工黨李卓人做Plan B。睇返上次補選經驗，做過香港眾志Plan B並成功當選嘅區諾軒就話，民主派共識係被DQ者所屬政團有權決定誰是Plan B，自己同上次出戰建測規園界嘅司馬文都同原屬組織無關，但經由被DQ嘅周庭同姚松炎推薦，但上次新東同九西兩席係原屬青年新政梁頌恆同游蕙禎，先搞到情況比較複雜，而唔係按以上政治倫理處理，直言覺得阿基對有關共識似乎有啲誤解。

區諾軒認為，劉小麗今次做法係希望複製上次比較可行之處，「（初選）最大傷害係公共層面後期（出現）好難聽嘅指責，九西3個候選人初選後期互相指責，係最傷民主派團結」，又話劉小麗面對馮檢基指摘，「從溝通角度係無比謙卑」，就係想避免挑起矛盾。而除咗馮檢基同劉小麗，食衞局前政助陳凱欣今日亦已報名參選。

立會補選新聞，《蘋果》一網睇晒
http://bit.ly/appledaily1125