【關你影視】電影導演郭子健（Derek）與黃智亨（Henri）前晚於《蘋果》娛樂節目《關你影視》第二集開live大談《超人特工隊》（Incrediables）及對續集預測，更有Pixar歷來最愛。
黃智亨說︰「《超人特工隊》成件事好熱血，我最鍾意嗰段係去到個島度，由細到大唔畀個細路跑，有日叫佢衝，仲喺水度跑，好high。」郭子健則指《超人特工隊》令他想起《打擂台》：「我好鍾意啲suffer hero，《Incrediables》正正就係，佢喺公司俾人壓榨，到佢要練番自己做掌上壓，我好興奮。嗰陣我部《打擂台》唔多唔少有呢種感覺，總之唔係你嘅日子，又年華老去，係一脈相承。我鍾意《Incrediables》但唔想佢有續集，因為第一集太完美，唔知第二集仲可以搞乜。」
雖然他們都是Pixer粉絲，但黃智亨說都有例外：「最唔好睇就係《Cars》但又最快拍續集，因為啲車太好賣，但集集都麻麻地，我唯一一套睇Pixar瞓覺就係《Cars》。」

CoCo正面講生死

他們又同時喜歡《玩轉極樂園》（CoCo），特別欣賞他「死」得有技巧，黃智亨說：「套戲講咗細路仔問你，唔知點答嘅嘢。例如，爸爸你會唔會死？佢用好正面嘅方法講咗畀你聽乜嘢叫做死。」而郭子健亦指齣戲簡單直接：「《CoCo》一個鬼字都冇提過，呢個唔係陰間嚟，所以佢可以喺內地上畫。你諗吓佢首歌個melody組合，行到黐線，但大樂必義吖嘛，音樂一響就毛管都戙晒，不得了。」
採訪︰何德
攝影︰林賓尼