特首梁振英早前宣佈唔會參選下屆特首，目的都係想多啲時間陪家人。咁佢會陪家人做乜呢？

梁頌昕：
「行李門事件」嘅主角，今年3月底頌昕留低咗手提行李喺禁區外面，結果梁唐青儀同梁振英分別出面，要航空公司職員將行李拎入禁區。最近頌昕仲被揭發，6年前極罕有以中學生身份，喺投行摩根大通做實習生，當年仍係戴德梁行亞太區主席、 行會召集人嘅梁振英，就被指又用特權。

梁齊昕：
齊昕早前被發現入住威爾斯親王醫院兩個月，梁振英同太太梁唐青儀不停喺醫院出出入入探望。直至到28號，齊昕終於更新咗facebook，就話自己係倫敦希斯洛機場，話係佢第二個最愛嘅家！返到屋企咁開心，睇嚟乜病都冇晒啦！

梁傳昕：
傳昕就比較低調，但上年都試過成為焦點人物，事關好好package嘅劉鳴煒捐咗5,000萬美元俾瑞典卡羅琳醫學院，仲以佢個名命名咗做「劉鳴煒復修醫學中心」。至於梁傳昕呢，就喺瑞典卡羅琳學院進行博士後研究，被指係一條龍為梁傳昕嘅事業鋪路。