剛啱快活谷夜賽，告東尼出五駒全部起用外籍大師傅，徒弟蔡明紹及吳嘉晉冇着落。結果有「加州再豫」配郭能贏馬，「鴻圖飛星」配蘇兆輝亦跑到第三。

當中「加州再豫」上仗配蔡明紹跑同班同程落敗，但再出換上硬功之郭能即建奇功。事實上，近期不少東廐馬由蔡明紹騎完換洋將變身，最經典例子必數明星馬「巴基之星」，換莫雷拉輕勝奪取新馬錦標，還有「加州騰龍」和較早前「巴基小子」改配洋將後，亦可即時提升名次跑獲亞軍。

今次東廐出八駒，蔡明紹只分到兩匹機會較次的馬，至於連續兩仗在其胯下失諸交臂的第三場「一定賺」，一如「加州再豫」換上郭能但求穩陣贏番仗。

三歲的「一定賺」出賽五次，表現一仗比一仗進步，前次初跑田草1200米配蔡明紹仍被落飛黨睇中，可惜末段取位欠順，只以四分三馬位輸俾「運財童子」跑第三，上場原莊配搭再跑同程，蔡明紹已騎得有板有眼，可惜仍被老虎「錶之星」生擒飲恨第二。

今次「一定賺」相隔兩星期又跑，換上郭能，以其硬功當然可省得起此匹千二磅大馬，排埋1檔在最窄C加3欄肯定有利。同場有不少初出馬進度靠估，「一定賺」卻有晒賽績根據，在這組四班賽事有足夠條件補中。