綽號神仙嘅蔡約翰最近關照了好幾位下風騎師，先有最近頓失支持的祈普敦，就算之前搏失了好幾匹蔡廄熱門，最終「哈蝦巴爸」依然不換人為騎者雪中送炭。

跟住輪到傷癒復出的黃皓楠受惠，上周三（31日）贏蔡廐「達羅素」；當然不可以數漏無復當年勇的杜利萊（綽號杜記），「翩翩」為他帶來久違了的一級賽勝利，無疑雷神仍是蔡約翰的主力劊子手，但以蔡廐近日牛氣沖天，馬好用甚麽騎師都掂！諗深一層，正值停賽的韋達目前常坐冷板，大可向這位舊拍檔求救！

今次（7日）第二場四班2200米，蔡廐「勁豐裕」歷來五場頭馬由雷神及蔡明紹包辦，但雷神今趟騎早前夾檔大勝的「歐洲之星」，而同場蔡明紹則寧選「快樂神駒」，表面看「勁豐裕」落到杜利萊手上似是賣剩蔗，但這匹七歲馬最近四次跑谷草1800米或以上長途全入三甲，上仗「勁豐裕」田草2000米取得第5，較對上兩場跑12名有大躍進，慢熱馬跑起狀態，你認為杜利萊今次是捱義氣，定或冷手執個熱煎堆？

第五場四班1200米，葉廐「大運舞台」由賴維銘換雷神必熱，但近兩季騎練合作過13匹熱門未嘗一勝，同場「金碧輝煌」如因此換來分頭，可再追一次。「金碧輝煌」前仗贏五班谷草1200米，已交出足夠在四班贏同程的表現指數，上次則無緣無故轉戰田草1200米，結果全程外遊，大可當無跑過，今次賽前梁家俊連操七課，應未收夠籌。