【新增回應】

現年36歲前落選港姐張韋怡（Gogo）日前被姑仔在社交平台出post鬧爆貪錢惡行，其後Gogo接受《蘋果》訪問，反擊姑仔指控，揚言再被抹黑，會保留法律追究權利。今日Gogo再出post，她說：「之前在社交平台長篇發文抒發經歷遭遇的『奇人奇事』，被人隔空禁言迫刪，一直啞忍浪接浪的設局與欺凌，『莫須有』指控，感恩一直陪伴我支持我的人。由頭到尾，有忍有讓有寬恕的一直係我，善良永遠不能留給邪惡的人！無了期的忍讓只會令魔鬼更張狂，我一直都係做好自己本分，無論工作、妻子、媳婦、母親、女兒身份，我問心無愧，對得住天地良心！對於完全99%的扭曲事實和倒果為因的指控，我會先以一句『多謝關心』回應，適當時候再作回應。」

不過這場豪門恩怨仍未停止，今日Gogo的姑仔潘小姐主動聯絡《蘋果》，表示要親自回應事件，並指有人大話連篇兼誣蔑她，聲稱手頭上有對方講大話的證據。對於Gogo聲稱是爺爺主動給100萬現金予孫仔做教育基金，潘小姐說：「我哋之前好friend，佢經常性喺我面前扮可憐，話要為個仔打算，成日喺我度搲嘢，因為我爸爸係好錫我，只要我開口，佢都唔會拒絕，所以想我幫佢，不過我都好錫佢個仔，所以幫佢都冇所謂。」其後潘小姐向爸爸提出，他一口便答應：「爸爸係經我畀錢佢，佢有冇攞嚟用，真係唔知道，但係好快就有一單新聞話佢出去讀書。」

潘小姐亦提供了對話截圖，反駁Gogo的說法，對話見到Gogo在2018年8月，曾向潘小姐提出要求幫忙代找教育基金，亦問到英國有甚麼學府適合兒子，計劃兒子14、15歲便安排出國讀書，到時可以在當地供定層樓，Gogo言談間透露一家人使費「月月清」。另兩張截圖見到Gogo似乎不滿大哥一家住大宅，曾說：「仲有賓仔做司機，我嗰嗰出街最麻煩，又BB車又奶粉尿片又行唔到，我哋先最需要司機。」、「佢哋喺大屋住已經着數晒喇！」、「咁多工人用出公數！」、「點解佢哋免費工人、伙食、住大屋，我哋乜都要食自己？」、「畀4房一廳叫佢哋走喇！」另一截圖，Gogo問潘小姐表示，希望有一間小朋友房，要求潘小姐代為向爸爸提出。

潘小姐向《蘋果》說：「呢度證實咗佢話我唔鍾意佢哋搬番嚟係一個好大嘅大話，因為我係全程協助，如果知道我唔鍾意點解要同我商量？同埋咁樣問我嘅話，其實都係暗示明示想要我確實問爸爸，如果唔鍾意又點解會幫佢問咁唔合邏輯？盲嘅都睇到，張小姐真係所有大話一個冚一個，10個煲9個蓋。其實係佢唔鍾意嗰個大哥，成日想趕佢哋走，咁佢哋可以搬返嚟。嗰陣佢住緊九龍城，但係好想住九龍塘。」

潘小姐表示兩人正式交惡，是從Gogo媽媽搬入大宅開始，她說：「其實計較唔係我，係佢媽咪。嗰陣佢係嚟照顧個BB，佢連雞蛋、牛奶都有計一餐，有一日見到工人喺雪櫃寫低雞蛋數目，我一問之下，原來係佢媽咪話唔見咗雞蛋，其實我哋屋企一切都冇所謂，唔計較任何嘢，所以之後咪分開雪櫃。可能佢覺得自尊心受創，之後佢同哥哥去咗旅行，可能佢媽媽講咗好多嘢，Gogo返到嚟咪好嬲，應該係喺嗰陣開始唔鍾意我，我都有同佢解釋，不過解決唔到，大家冇再傾偈。」

直至潘小姐看到Gogo引用哲學家尼采的文章出post，結果大為嬲怒，決定出post反擊：「講乜都好，點解又要搞到啲老人家？我親眼見過佢三更半夜搵爸爸，話自己幾咁可憐，佢話要保留法律追究權利？我完全冇擔心過，我講嘅嘢全部都有證據。」提到炒工人一事，潘小姐說：「係佢趕到走咗一個工人先，所以咪要請看護，我同哥哥為咗呢件事，嗌咗幾次交，本來我哋嘅感情好好，但係Gogo嘅人品真係太差，佢話喺日本同我哥哥註咗冊，有證據就攞出嚟，冇嘅話就唔好亂講。」

潘小姐最後反駁無需要與外人爭家產：「佢叫我知足，分贜唔勻，我覺得好奇怪，點解佢一個外人，會知道咁多我哋嘅家事？如果要傾，都係搵番哥哥或者爸爸，點解要對佢呢？有份嘅人，點解需要爭呢？只係嗰啲冇份嘅人，先要去爭。如果爸爸係重男輕女，同爸爸搲嘢就唔會叫我喇，應該叫佢隔籬嗰個叫。我生出嚟係喺呢個屋企，佢唔係，佢入嚟想要攞嘢，惟有係對付我啫，我無端端要對付一個外人，又有乜嘢作用？唔係好合邏輯。」潘小姐還說：「佢嘅行為都唔關我個哥哥事，我哥哥係蒙在鼓裏，佢係背住我哥哥做呢啲嘢、所有嘢。佢話我冇朋友，冇拍拖又冇嘢做，其實係同呢件事無關，我點會冇工作，唔好玩喇，佢係冇實質證據，咪轉移大家嘅視線。」

對於姑仔的指控，Gogo今晚回覆《蘋果》說：「太市井，誹謗完、再不誠實使用電腦，這些行徑正是這年多來她的『事業』。」Gogo並複述老公的說話，指姑仔潘小姐將是事件最後的輸家：「失去自己最親的兩個哥哥，自己冇丈夫冇兒女冇姪會認佢！我gogo本人冇任何回應。」