【智取大市】新經濟越炒越細要防(晉佳)
晉佳JS環球生活AIoT
Cloud security股份Zscaler 4日內由70美元升至110美元
外圍新經濟股炒到癲,3月下旬起由FANGMAN起步上到高位,然後炒到下一個梯隊嘅Shopify變千億美金市值,近幾日炒到cloud security幾隻100至200億美金以上市值嘅股份,越炒越細,趁最後派對高追係勇字行頭。當大隻行得摩、細隻笑呵呵嘅時候,還記得2月炒到SPCE幾日倍升成為新聞,一炒爆就成個市一齊爆煲,始終要小心。至於港股目前嚴格嚟講得返一隻美團(3690)喺度飛舞。
承接上周討論AIoT概念,JS環球生活(1691)(下稱JS)旗下九陽本來做小家電,A股上市,股價近期算穩步上揚,而JS 2017年9月用16億美金收購美國吸塵機霸主Shark同小家電企業Ninja七成股權,唔知JS買SharkNinja算唔算不合時,因為跟住就打中美貿易戰。Shark吸塵機喺美國銷量排行第一,舊年開始攻入中國大陸市場,進行交叉銷售嘅第一步,低基數之下增長強勁。以經調整純利計,JS環球生活市盈率大概17.9倍,可見AIoT概念未反映。
踏入5G時代,第一個值得憧憬嘅新產品係掃地機械人。SharkNinja今年初用不多於2.1億人民幣收購大陸速感科技,後者係以機器視覺為核心嘅人工智能創業公司,JS收購公告講明「提升本公司未來於家庭機器人及其他相關智能家用電器領域的創新能力」,掃地機械人應該只係第一步應用。
速感科技喺2014年創辦,喺2017年進行咗1,000萬美金嘅B輪融資,係Intel嘅合作夥伴,最後落入SharkNinja手上,JS未來靠住速感科技加強AIoT,而速感科技亦可倚賴JS嘅規模去擴充其他AI場景應用方案,就咁睇,長遠似係大茶飯。
https://www.facebook.com/advanceguy1