李逸朗自導自演嘅電影《特區》今日喺紅磡進行拍攝，其他演員有藍燕、海鳴威、陳達仁等，李逸朗透露今次投資7位數字，又指呢部戲係講香港人點樣渡過沙士、金融風暴同金融海嘯，佢話：「當年我爹哋有的士，但經過嗰幾年，我哋屋企要重新嚟過，包括要賣的士，爹哋都要去打工，03年我入行，當時一個騷都冇，好彩我入咗電視台拍《四葉草》。」金融風暴嘅時候有冇蝕到損手爛腳？李逸朗話：「當時我仲未有能力去投資，因為我剛剛踏入社會，傻下傻下避過一劫，但我亦享受唔到買樓嘅高峰期，因為自己未有資本。」

藍燕喺戲中同海鳴威飾演情侶，兩人將會有kiss戲，藍燕話：「我嘅角色好清純、好保守，唔使性感，我係飾演一位聽覺受損嘅按摩師，因為男朋友花心而拋棄我，但後來佢後悔會搵番我。」不過喺現實生活中，藍燕就話面對花心男友食回頭草時，佢就一定唔會心軟：「以前讀書遇過男朋友有第二個，我即刻走，同戲中角色唔相似，但相似嘅地方就係靠自己創業，唔會攞男人錢。」