嚟緊下個月張敬軒會同鍾舒漫、洪卓立、許靖韻等喺會展有個音樂會，今午佢哋先開會傾細節，之後洪卓立（Ken）同鍾舒漫（Sherman）去到新城做宣傳，佢哋話未開會前，仲傾緊兩個人合唱啲乜，點知同軒仔傾完之後，兩個人就無視對方存在，Ken話：「軒仔話會同我合唱我首歌，未開會前都好輕鬆，0依家反而心情好緊張，因為軒仔喺我心目中都好有地位。」而Sherman指軒仔想同佢一齊彈琴演出。

今次個騷以「青春」做主題，軒仔希望大家喺台上分享少為人知私人青春秘密，Ken話會講番自己肺積水時嘅經歷，問到Sherman講乜？旁邊Ken提議佢講好「Deep」嘅嘢，鍾舒漫甜笑話：「可以講下入行以嚟好『deep』嘅感受。」

對於彭順同李悅彤（Liddy）當街親熱嘅新聞，Sherman話：「睇完段新聞後，有少少氣促透啖氣，我諗女仔角度，望呢件事會幾痛。」

Ken就覺得冇得唔認冇攬錫，佢話：「我又唔需要作為警剔，我仲同個女仔兩年幾前，拍過港台手語節目，佢冇主動埋嚟結識我，可能對我冇興趣啦，完全無嘢，冇抄我牌（攞電話號碼），抄都唔畀啦，我好少嘅。又唔覺得特別與眾不同，正常人，當時都係拍一日。」