叮咚!Call bell響起!傭仔衝出機艙去回應呼喚佢嘅乘客寶寶。
一出到去,見到有個香港太太。
太太:「請問你哋有冇牙籤㗎?」
傭仔:「個cutlery set(餐具包)入面應該有㗎喎!」
太太(打開晒個cutlery set):「得啲刀刀叉叉鹽同胡椒,真係冇喎!」
咦?唔通我記錯咗?由於我本身係香港茄子航空嘅空中服務員,參加咗公司一個交流計劃,而家去咗維記澳洲航空,有好多時仲係記住原本自己公司嗰一套,所以記錯都唔出奇!
嚟到外國公司,唔難發現兩間公司嘅文化差異!
首先就係——「牙籤」!唔知大家有冇發現,外國人其實好少撩牙㗎!所以餐具包入面冇牙籤係好正常,佢哋覺得唔係必要嘅嘢!相反,亞洲乘客特別係中國內地或者係香港人,就好習慣食完飯之後撩一撩棚牙先,費事攝住條菜吖嘛!
又有另外一次, 叮咚!Call bell再起響起!
一個男人。
傭仔:「先生,有咩幫到你㗎?」
男人:「可唔可以畀對拖鞋我?」
傭仔:「無問題!」
傭仔心諗,Business Class(商務艙)唔會冇拖鞋啩?點知,傭仔又係記錯咗喺茄子航空嗰一套,以為business class實有拖鞋,點知維記航空係冇嘅!於是,傭仔就唯有同個客say sorry,坦白講出佢初嚟貴境,作為交流大使嘅身分。
維記雖然冇拖鞋,但係佢哋係有整套嘅睡衣同埋襪!唔知大家有冇留意,外國人係好鍾意著埋對襪甚至赤腳喺機艙上面遊走,而亞洲人就習慣著拖鞋,有時甚至會著住唔同酒店嘅拖鞋……作為一個香港人,我都深明拖鞋嘅重要性,尤其係一個空中服務員,深知機艙環境並非想像中咁乾淨,所以完全幻想唔到點解啲外國乘客可以喺機艙赤腳行走……
除咗硬件上嘅分別,其實外國人同亞洲人嘅乘客對空中服務員都好大分別。例如外國人會傾向比較熱情,一上到機會主動問你「How are you?」,走嘅時候又會同你講「Have a good day」,有時甚至會記得你個名,所以返工有時都幾窩心。
嚟到維記澳洲航空之後,真係有少少大開眼界。仲有好多返工唔同嘅趣事、乘客或者同事之後嘅文化差異,之後再同大家分享!
專欄作者簡介:
空中飛傭
做過廣告、設計、插畫,而家係香港茄子航空嘅一名空少,喺維記澳洲航空交流中。2016年曾出版人生第一本繪本《空少傭乜易》,夢想係成為一個少女系漫畫家。用文字同插畫,同您分享喺飛機上面工作嘅點滴。
Facebook專頁:空中飛傭 The Flying Maid
https://www.facebook.com/theflyingmaid