財政司司長陳茂波今日出席商界聯席午餐會，進一步講解財政預算案內容，會計界議員梁繼昌、特首辦主任陳國基、接棒長和主席的李澤鉅等都有出席，可惜波叔會上未見有乜嘢新消息發表，更遭到「娥粉」狙擊。

林鄭競選特首時做過佢資深顧問嘅印度裔企業家Aron Harilela（夏雅朗），今日午宴上向波叔「追數」，話政府講過會成立一個工作小組，研究如何改善營商環境，但至今未睇到有做過乜，大呻商界對於經常要因應政策更新，東奔西跑而感到沮喪（frustrated）。夏雅朗又投訴，現時商界嘅建築計劃，好多時都要先經過3個政府部門審查，而政府有關新經濟同電子商務嘅政策，更與今時今日嘅營商環境「完全脫節」（completely out of touch），追問呢個研究小組幾時先會開始有進展。

面對娥粉狠批，波叔回應時就話娥特喺施政報告已講咗會成立「政策創新與統籌辦事處」，而呢個辦事處4月1日就開始做嘢，同不同政府部門檢視政策，睇吓有乜程序可以簡化，令到政策更及時同應付到新經濟。

波叔又話，政府亦留意夏雅朗提出的政府程序繁複問題，話喺發展局帶領下，不同局都會嘗試簡化程序，政府適當時候亦會諮詢業界喎。