【銅鑼灣→中環】
姊妹組合2R嘅黃婉佩（Race）同拍咗3年拖嘅向佐最近因迫婚唔成最後散咗，心情應該麻麻。前日下午3點幾就見到佢遠喺新加坡嘅父母返咗嚟，陪佢喺時代廣場飲下午茶散心，期間Race講到手舞足蹈喺度呻，兩老就好專心咁聽，不時仲見Race好忙咁搞兩部手提電話。

唔慣搭港鐵

佢哋飲完茶落樓下排隊搭的士，不過太多人排隊，最後轉搭港鐵去中環。平時出入有司機接載嘅Race似乎搭唔慣港鐵，搞咗五分鐘先搵到畢打街出口，沿扶手電梯上咗蘇豪區一間時裝店。黃媽媽不停試衫仲着出嚟問意見，冇耐就見到家姐Rosanne揸車帶埋BB嚟會合，兩老見到個孫不知幾開心，特別喺度悶咗好耐嘅黃爸爸，抱住個孫同佢玩。喺時裝店逗留咗半個鐘，黃媽媽買到心頭好，跟住幾個人行咗去隔籬間餐廳開餐，食完飯一家人就坐Rosanne架車返咗佢半山嘅屋企。
採訪、攝影：吳耀輝、李志明、梁繼光