本港企業做生意搵錢之餘，好多時會回饋社會，出錢甚至出力，幫助有需要嘅弱勢社群，有時對內地都會施以援手。新鴻基地產最近捐咗五十萬畀「淮河賑災行動」，幫助災民。
新地副主席郭炳聯話，早排內地同香港齊齊爆發非典型肺炎，中央堅持運批醫療物資落嚟畀香港用，今次內地有事，又點可以唔幫手呢？新地係第一家捐款嘅私人企業。聯少話，希望今次可以起帶頭作用，推動其他公司同市民踴躍捐款。
過去幾年，雖然經濟一年差過一年，但新地喺慈善捐款方面就有多冇少。零零/零一年度捐咗四千七百萬，零一/零二年度就係六千八百萬。

避「風」頭海典軒押後開售
昨日三號風球高掛，影響賣樓活動。信和屯門海典軒原本今個禮拜六公開發售，不過「伊布都」來勢洶洶，中午過後開始橫風橫雨，唔多唔少會影響買家置業嘅雅興，所以決定延遲到下星期，日期待定。
信和營業部副總經理韓家輝話，八個公開發售單位，最平要九十三萬幾，平均呎價約一千六百蚊。另外，本周末中原送五千蚊寢室用品畀買家，名額五個。