早前因病而取消台灣宣傳工作嘅陳奕迅（Eason)，今日精神奕色現身九龍站一所酒店，為下月推出全新國語專輯《C'mon in~》舉行全球唱片宣傳發佈會，並宣佈將於本月二十二日起，於中港台、星馬、美加及歐洲等18個地方舉行19場「Eason says C'mon in~Tour」，親身演繹十首新歌，當中唯獨香港演出兩場，於下月十一及十二日假麥花臣場館舉行，並於明天公開發售門票。

Eason找來今次監製Jerald一齊分享新碟點滴，兩人分隔香港及加拿大兩地，所以全程靠whatsapp傾歌，由於兩人份屬好友，傾歌時也相當直接，Jerald指畀咗首歌demo Eason，點知Eason回覆係「唔夠好」，Jerald話：「一睇到佢咁講，我就揼咗嗰demo，然後覺得好正，大家咁直接，事後Eason有話唔好意思，但我覺得咁仲好。」Eason特別要求到台灣錄音，因為在港錄音會有惰性，在台灣會心急工作完然後嘆美食，所以Jerald表示只花十日便完成錄音工作。

講到之前因病刹停工作，Eason解釋只係初初病起，但擔心會越來越嚴重影響之後工作，所以決定返港休息三天。今次在港開騷只得兩場，Eason指沒去想會否被人炒飛，留待其他同事處理，佢透露係刻意於出碟後首站返香港開騷，佢話：「好耐冇做細場，好掛住，之前做百幾埸以萬人計埸地，細埸親近啲，同返香港自己地方有歸屬感。」

獲唱片公司新藝寶全力支持，Eason表示眨眼間合作了十二年感覺愉快，佢又透露自組嘅唱片公司已經有六年之久，旗下只得佢一位藝人，問到參與內地歌唱比賽《中國新歌聲》時，會否物色有潛質新人簽為旗下？佢話：「我有諗法幻想，如果係我公司藝人會點去裁培佢，但好難，我知道自己麻煩，藝人係好麻煩物件，所以我做唔到經理人，唔可以理智地承受佢嘅麻煩，我分分鐘同佢開拖，你唔聽我，我食鹽多過你食米。」所以公司旗下仍得佢一人。