話咗大成交跌市唔使驚,因為係先跌後反彈,昨日港股食住前日個勢,向上推進,雖然埋單計數先升9點,但係就有580億元成交同埋粒閃亮亮嘅「十字星」撐住,個市仲係反覆向上嘅格局。
美股喺高位徘徊,今個禮拜有好多重要數據,美股會好飄,不過,㗎仔個市就開始造番好啲,如果個勢keep住,有機會反覆升多500點,上試16800,對港股炒上嘅氣氛好有利。
𠵱家港股嘅成交咁大,表面睇就係好淡大惡鬥,但由兩個月前睇到呢刻,好友仍有優勢,淡友昨日好似想搵隻滙控(005)嚟質低個市,但係滙控嘅支持位好近,要質得深唔容易,事實上,一隻滙控好難拖低個市,仲要睇其他大藍籌嘅表現,睇嚟睇去,𠵱家仍然係造好着數啲。
港交所(388)公布嘅季度業績唔曳,昨日企喺65.75元收市,升0.5%,仲未發力,今日應該會炒上去,隻C輪3682昨收90仙,升4.6%,牛刀小試,跟番昨日嘅建議嚟炒,應該會有唔錯嘅斬獲。