每年差唔多呢個時間，打工仔都望天打卦，睇吓今年有冇人工加？加幾多？如果今年老闆同你講，薪酬金額不變，但會改用人民幣支薪，你會有乜反應？相信第一時間未必知道即係加咗幾多人工，但係肯定唔少人都會歡迎。
不過，跟住大家應該會同敏妮講，「咪發夢啦！」原因係，即使公司收入以人民幣為主，如果有得揀，老闆都唔會揀人民幣支薪。正如內地有錢同胞嚟香港掃貨，掃得咁興奮，因為唔使開口攞折扣，用人民幣兌港元嚟買嘢，已經差唔多打咗個85折。

北上定存　息價兼賺

出唔到人民幣糧，仲有冇辦法可以有穩定嘅人民幣收入？之前講過話返大陸開人民幣定存戶口都係辦法之一，何況踏入加息周期，息價兼賺。
另一方面，敏妮月供股票都選擇受惠人民幣升值嘅平保（2318），可惜作為H股股東，平保嘅股息係以港幣支付，敏妮收唔到人民幣股息。
當然人民幣升值，兌換到嘅港紙都會多咗，但敏妮唔係退休人士，未使用到股息收入，所以股息只會繼續保留、繼續投資。
既然係咁，如果直接收到人民幣，敏妮可以將佢做定存，令股息增值。家陣就要儲夠一定金額，再轉換為人民幣，既嘥時間，又蝕兌換手續費。
隨着香港銳意發展為人民幣離岸中心，如果香港散戶能收到人民幣股息，將人仔囤積香港，有助增加香港人民幣資金池。究竟平保幾時好似滙控（005）咁，俾佢嘅股東揀收邊隻貨幣嘅股息呢？

溫敏妮
http://wanmanli.com/blogs/