觀塘麗港城業主楊生換樓，以1,377萬元換入宏安（1243）及旭輝（884）合作發展的油塘曦臺一個3房單位。換樓理由好簡單，麗港城舊了，相信新樓升值較好，更重要是45歲人，「如果10年後，或者幾年後先做呢個決定，我未必借到（按揭），始終要計我哋年齡。如果今日換到就今日換，5年後我哋未必換到㗎喇。」11月收樓，資深驗樓師賴達明驗收發現，窗邊防水膠邊吊吊揈，廚房和廁所的水龍頭認真麻麻，鬆了都話可以自己扭返實，但浴缸轉換掣實到撳唔入。慶幸沒有空心磚、批盪空鼓等大問題，最需要注意是玻璃，臨海單位主人房玻璃窗有兩個氣泡，食風位又猛太陽，唔換好易爆。

楊生與老婆及媽咪一家三口住東九龍多年，「差唔多每10年就換一次樓」，20年前買入藍田居屋康雅苑，2012年以500多萬元換入麗港城3房單位，眼見單位越住越舊，如果全屋大翻新動輒約60萬元。從事貿易公司的他，早年晉身管理層，收入今非昔比，就想換新樓嘆吓。

「呢個決定同朋友傾過，我都掙扎嘅，希望今次搬屋係明智啦！麗港城係唔捨得，始終住咗一段時間，嗰邊環境管理都好。油塘會大變天，遲啲希望有能力再買多個單位投資，而家呢個（曦臺）自住。錢當然係一個問題，但老人家改變環境係最大難題，因為佢習慣咗麗港城。但其實隔籬啫，油塘啫，一個地鐵站啫。另外，管理費係貴嘅，每呎5元，麗港城2元多，可以話用錢換服務啦。呢度我哋睇10年，10年後如果樓市真係可以嘅，可能到時，睇吓我媽咪情況點，甚至乎換返細單位都會考慮。」

現實一點，是考慮單位升值問題嗎？「都係，始終麗港城樓齡舊，10年後升值係慢。有能力換樓，始終我而家年齡去銀行上會計數都叫做供得長。如果10年後，或者幾年後先做呢個決定，我未必借到（按揭），始終要計我哋年齡。如果今日換到就今日換，5年後我哋未必換到㗎喇。」他坦言，他45歲了。於是他將麗港城以900多萬元沽出，賬面賺約400萬元，然後再補上積蓄，去年12月以1,377萬元去換入曦臺一個3房單位，實用716方呎，呎價19,232元，支付4成首期約550萬元，借6成，分25年還，月供約3.7萬元。

單位11月收樓，他自覺滿意，特別是景觀，但樓市現在麻麻地，他答：「呢個質素、方向、樓層、面積，唔使2萬元一呎，今日來講合理！樓價跌，唔擔心，呢間屋係自住。供得起，我覺得畀屋企人安心重要過擔心樓價跌。假設樓價跌5年，5年後咪升返，始終對油塘有信心。」

樓盤是宏安地產與內房旭輝合作發展，是旭輝在香港首個住宅項目。資深驗樓師賴達明驗收單位，入屋就發現大門門框裂開，長逾1呎，見到有補過，但補唔好，摸上手都摸到起級，建議更換。入屋左邊是廚房，防火門玻璃輕微刮花影響觀感而已，打磨就可清除，但廚房玻璃窗的花痕就非一般，「有兩處花痕係清潔時刮花。根據中國國家優等品標準，玻璃刮花長逾10厘米之外，花痕粗過1毫米亦不符合標準。呢度可以先試打磨，如果唔得，就要換。」另外，洗碗盆水龍頭鬆，容易滲水入櫃底，可以瀄返防水膠邊。

單位有兩個廁所，明哥話：「客廁花灑頭漏水，整返好容易，扭返實就得。但浴缸水龍頭與花灑頭之間嘅出水轉換器就壞咗，而家只係用到花灑，用唔到浴缸水龍頭，個掣係實到撳唔到。」主人房廁所無大問題，不過就要留意兩個廁所洗手盆沒有溢水口，忘記閂水喉都好大件事。廁所非黑廁設計，明哥由氣窗探到一望就話：「出面部冷氣機散熱器，個電掣面爆開，露出一條罅，如果落雨滲水，有機會短路。」

明哥指出，單位最大問題是窗，主人房有一條窗邊防水膠鬆，如果打風落雨，有滲水風險，而房入面的窗有花痕 ，好簡單，打磨就可以處理，但該塊玻璃出現兩個氣泡，不符合中國國家優等品標準，「始終呢塊係單層玻璃，向海，兼陽光曬得好犀利，氣泡會增加爆裂嘅風險。」總結來說，單位沒有空心磚、批盪空鼓、來去水等大問題，整體而言是可以接受，但瑕疵就需要處理，否則演變成較大問題。

宏安發言人回應，有關單位執修細節項目，預計一星期內完成。執修工作完成後，會約見業主進行驗收安排。

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！