立法會噚日請高官食晏，話題離不開政改問題，政府最近推出兩個政改電視廣告好多人有意見，政府新聞處處長黃偉綸席間自詡，兩個廣告都係出自新聞處構思，點知即時被議員揶揄，特別係跳舞還原基本步個廣告，搵個熟女做主角最敗筆，冇乜睇頭咁話。

政府新推「起錨」廣告

黃偉綸死撐，話本來有條絕世好橋，可惜內部已經ban咗，出唔到街。據講政府其中一個電視廣告構思，係搵四個人開枱打麻雀，寓意政改已到食糊階段，既然叫糊，冇理由唔食袋錢落袋咁笨，在場人士引述黃偉綸稱，新聞處連口號都諗好，「有糊唔食，罪大惡極」。
八方未試過同黃處長開枱，唔知佢牌章、牌品如何，今鋪政改擺明做大牌，雞糊都食？香港人唔食糊，阿爺反唔反枱o架？其實公民黨08年選舉已拍過打麻雀政治廣告，由陳太做主角打「四萬」牌，新聞處呢條打麻雀橋，唔算新鮮。
打麻雀政改廣告胎死腹中，另一個「民主起錨」廣告（圖）噚日曝光，政府喺港鐵站大賣廣告，想講乜，好明顯。