有幾部荷李活經典電影，都宣佈開拍續集，或者落實重新拍攝。

荷李活巨星布斯韋利士（Bruce Willis）主演《虎膽龍威》（Die Hard）系列將拍第6集，今次故事穿梭70年代同現今，除咗布斯飾演嘅現在版尊麥堅，仲會有一名年輕版演出70年代戲份，年輕版演員暫時未定。《虎膽龍威6》將由韋斯曼（Len Wiseman）執導，而佢接受《Deadline》訪問時透露電影唔係單純嘅續集，而會穿梭70年代同現今，布斯亦已簽約落實回歸，佢嘅戲份亦應該相當重。

至於科幻喜劇《黑超特警組》（Men in Black）亦宣佈即將回歸，定於2019年5月上映，不過呢部並唔係《黑超特警組4》，會宏觀咁講秘密組織MIB喺全球嘅事，而唔係單單管理美國境內嘅外星難民，所以韋史密夫（Will Smith）同湯美李鍾斯（Tommy Lee Jones）都唔參與演出。

另外，據《Variety》報道，《神探俏嬌娃》（Charlie's Angels）都將會重新拍攝，《神探俏嬌娃》喺1976年首度拍成劇集，直至2000年曾拍成電影，並由金美侖戴雅絲（Cameron Diaz）、杜莉芭里摩亞（Drew Barrymore）同劉玉玲主演。今次重新翻拍《神探俏嬌娃》，暫鎖定姬絲頓史釗域（Kristen Stewart）擔任女主角，雷碧達尼安高（Lupita Nyong'o）亦有望演出。