香港攝影記者協會主席陳奕釗應《蘋果》邀請，檢視「可疑」畢業照照片後，發現照片有多處不尋常改動，「佢哋好多同學仔，隻手指公都係直嘅，要做呢個動作都有啲困難。即係無理由全級咁多人，個個啲手指都係咁樣㗎嘛。」他對攝影師進行如此大型的P圖亦相當不解，「呢度成百人，如果要逐個P都好麻煩，直接影過張會無咁複雜囉！」另有攝影師則透露，曾聽聞過其他學校同樣要求「P走」畢業相中的政治手勢，顯示今次爭議非個別事件。

從事學校「班相」攝影7年的攝影師阿傑（化名）則透露，P圖的情況在行內十分常見，畢業照有時也會有改動，「小至「P走」啲眨眼呀、粗口手勢，大至成個背景換咗佢都試過。」但阿傑指過往一般改圖的原因都是為了更佳的視覺效果，而非為了政治審查。他又指在「反送中」運動前，甚至在2014年雨傘革命時期，學校一般甚少政治審查，「嗰陣仲有啲大型道具添，好似黃色banner嗰啲，但啲相都係有出到嘅。」

阿傑指公司近期亦聽過有學校要求改走類似手勢，更有親中左校為避免同學做政治手勢，甚至放棄拍攝「Q版」班相，部份攝影師或要跟從指示，「始終佢哋係客人。」

但他指攝影師一般不會主動要求同學避免做特定手勢，他任職的攝影公司更表明，短期內絕對不會答應學校改走任何政治手勢的要求：「始終我哋個角色係攝影師，嚟係幫佢哋影相，你做咩動作我哋唔會阻止你。」對於有學校要求攝影師更改手勢，阿傑指其實業界的攝影師們亦甚不滿，認為此要求十分缺德，「咁始終佢哋做咩動作係佢哋當刻嘅諗法嚟架嘛，如果你唔畀做咪一開始就唔畀，咁樣（暗中）P圖好陰濕。」

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568