李家鼎同施明今晚娶新抱，仲雙喜臨門，新郎哥兼準爸爸李泳漢當然開心到爆，但李泳漢爆細佬李泳豪仲開心，李泳豪話：「係呀，都估唔到自己咁開心，做人阿叔嗰種心情真係好難去明白。」佢仲話會準備定禮物畀未來姪仔/姪女：「不過要知道係仔定女先，但自己都覺得係仔。」

既然阿哥結婚都咁開心，咁將來自己結婚嗰陣，咪更加開心囉？李泳豪話：「我0依家都未拍拖，都唔知0架喎。如果有拍拖就會通知大家，不過，我覺得自己唔會緊張，因為參加過咁多婚禮。」提到佢都dry咗好耐冇拖拍，李泳豪就話：「都唔係，其實自己0依家都冇時間拍拖，啲時間排滿晒工作。」

再問李泳豪將來結婚的話，爸爸鼎爺可能會仲開心，李泳豪話：「應該都係，因為佢錫我多啲。」咁會唔會想快啲結婚？佢話：「呢啲唔係話想就得，覺得緣份嘅嘢冇得強求，屋企人冇畀壓力我。」咁有冇叫阿嫂介紹啲女仔你識？李泳豪話：「哎，我鍾意自己識女仔多啲。」